This is a subtitle for your new post

Ræktun, bakstur og bras er eitt valfagið í svokölluðum hræringi á miðstigi, en þar setja árstíðirnar svip sinn á verkefnavalið.
Í morgun í góða veðrinu skelltu nemendur sér með Diddu heimilisfræðikennara og Þóru stuðningsfulltrúa upp í Stórurð í berjamó og sveppakönnunarleiðangur.
Því miður höfðu einhverjir bæjarbúar verið á undan krökkunum á staðinn svo aðalbláberin voru að mestu uppurin. Fólk fór þó aldeilis ekki erindisleysu. Auk þeirra góðu áhrifa, sem svona göngutúr hefur á sál og líkama, fundu krakkarnir nokkurt magn af svokölluðum laxaberjum og einnig rifsberjum.
Það sem vakti þó mesta forvitni og gleði var heilmikið af fallegum og heilum furusveppum sem krakkarnir rákust á. Furusveppir eru mjög góðir matsveppir og er auðvelt að þekkja þá frá öðrum tegundum. Kennarinn lagði ríka áherslu á það að börnin skildu aldrei tína sveppi sem þau ekki þekktu því ótal tegundir eru óætar og sumar beinlínir hættulegar heilsu fólks.
Þeir nemendur sem vildu fengu sveppi með sér heim og ætluðu að fá foreldra sína til þess að hjálpa þeim við að gera eitthvað gómsætt úr þeim.










