Eineltisdagurinn var haldinn 8. nóvember og var ýmislegt gert til að undirbúa hann. M.a. höfðu nemendur 9. bekkjar útbúið glæsilega glærusýningu um einelti og við buðum vinabekknum okkar, 2. bekk í heimsókn til að sýna þeim glærurnar og ræða við þau um einelti. Glærurnar voru síðan sýndar með skjávarpa í anddyri skólans fram eftir deginum.
En eineltisumræðan er ekki einskorðuð við einn dag á ári, það er nokkuð sem er stöðugt í gangi.
Hún kemur m.a. fram í vinnu með uppbyggingarstefnuna sem einnig er viðvarandi. Á undanförnum vikum höfum við verið að vinna að bekkjarsáttmálanum okkar og hann er á lokasprettinum, kominn upp á vegg í annarri stofunni og rétt ókominn í hinni. Sá sem er kominn upp hljómar svona:
"Þegar við vinirnir erum saman viljum við hjálpast að, treysta hvert öðru, hlæja, grínast og vera glöð. Við lifum aðeins einu sinni, nýtum tímann og lærum vel."
