Í dag var 4. bekkur að læra um fiska og hvernig þeir fjölga sér. Mörg ný orð komu við sögu, eins og hrygning, hængur, hrygna, hrogn, hrognasekkur og klekjast. Við komust að því að sumir fiskar hugsa vel um seiðin sín, á meðan aðrir synda burtu strax að hrygningu lokinni, nokkrir fiskar líkt og karfinn fæða lifandi afkvæmi og skata gýtur fjóvguðum eggjum s.k. pétursskipum. Fiskbúðin Sjávarfang gaf okkur nokkrar hrognasekki sem við fórum með í náttúrufræðistofuna og rannsökuðum. Sumir krakkarnir ætluð ekki að þora að koma við hrognin í fyrstu og fannst lyktin vond, en um leið og við fórum að handleika hrognin og skoða þau í víðsjá hristu þau það af sér og tóku þátt. Helga kennari setti síðan nokkur hrogn á gler sem sett var í smásjá og þá opnaðist nýr heimur. Margar spurningar vöknuðu við þessa rannsókn t.d. hve mörg hrognin eru því sumur fiskar hrygna upp undir 300 milljón eggja líkt og tunglfiskur, á meðan aðrir eiga „bara“ 80 – 150 þúsund egg líkt og hrognkelsi. Af hverju hrygnir hver fiskur svona mörgum eggjum? Það var sannarlega líf og fjör í náttúrufræðistofunni dag.
